د سوېلي افریقا پخوانی ولسمشر جیکوب زوما چې د محکمې له حکم د سرغړونې له امله پر ۱۵ میاشتې بند محکوم شوی بېګا شپه یې ځان پولیسو ته تسلیم کړ او زندان ته لاړ.
ټاکلې وه د یکشنبې په ورځ بند ته لاړ شي، خو ملاتړو یې له کور انساني دېوال جوړ کړ، ځکه پولیسو د چارشنبې تر نیمې شپې وخت ور کړی او ګواښلی یې و، که زندان ته لاړ نه شي، په زور به ونیول شي.
۷۹ کلن زوما د سوېلي افریقا لومړنی ولسمشر دی چې په بند محکومېږي او جېل ته ځي.
د بي بي سي د راپور په حواله، نوموړی خپل ټاټوبي زولو ناتال ولایت کې محبوبیت لري او سوېلی افریقا کې د تبعیض پرضد پاڅون کې د نېلسن منډېلا ملګری و.
خو اوس محبس ته تګ او د مالی فساد تور- چې له امله یې له واک لرې شو- ښايي په واکمن ګوند اې اېن سي کې د شرم سبب شي.
سوېلي افریقا کې د بي بي سي خبریال نومسا ماسکو- چې د زوما لوکس کور ته نږدې تللی- وایي، د یکشنبې په څېر د چارشنبې په ورځ هم د نوموړی د کور شاوخوا ډېر پلویان ټول شوي وو او زندان ته یې د نوموړي د تګ مخنیوی غوښت، خو پولیس هم ډېر وو.
ښاغلی زوما له هغه وروسته پر ۱۵ میاشتې بند محکوم شو چې د خپلې نهه کلنې واکمنۍ اړوند فساد پلټنو په هکله یې د شاهدي ورکولو لپاره د محکمې له حکم سرغړونه وکړه.
ځینې سوداګر تورن دي چې د نوموړي واکمنۍ پر مهال یې سیاستوالو سره د دسیسې له لارې په پرېکړو کې لاسوهنه کړې ده.
ښاغلی زوما بیا بیا ځان د سیاسي دسیسې قرباني بولي او وايي، عمر او دغه هېواد کې د کورونا خپرېدو حالت ته په پام یې زنداني کول د اعدامولو په مانا دي.
که څه هم نوموړی پر ۲۰۱۸ کال د خپل ګوند افریقا ملي کانګرس له خوا له واک لرې کړل شو، خو بیا هم دغه هېواد په تېره خپل ټاټوبي کې ډېر ملاتړي لري.
