تاجیکستان اعلام کرده که به دلیل ادامه درگیری در ولایت بدخشان در شمال افغانستان و هم‌مرز با تاجیکستان ۱۰۳۷ سرباز افغان وارد تاجیکستان شده‌اند. این سومین گروه از نظامیان افغان هستند که به کشور تاجیکستان پناه می‌برند.
طالبان در دو روز گذشته چندین ولسوالی ولایت بدخشان را تصرف کردند و جنگ تا دروازه‌های شهر فیض‌آباد مرکز این ولایت رسید. فواد امان، سخنگوی وزارت دفاع در صفحه توییترش نوشته که مناطق حومه شهر فیض‌آباد، "از وجود تروریستان پاکسازی شد."
او افزوده که در عملیات زمینی و هوایی شب گذشته مناطق گرگ‌کشان، لایابه، چکوچ، کجی‌خم و اطراف شورابک پاکسازی و "تعداد زیادی از طالبان به شمول تروریستان چچنی، ازبکستانی و پاکستانی کشته شدند."
نیروهای مرزبانی تاجیکستان که تابع کمیته دولتی امنیت ملی این کشور است، امروز، دوشنبه (۱۴ سرطان/تیر) گفته که شب گذشته طالبان نواحی خواهان، شیکی، ماهیمی، شغنان و سلطان-اشکاشیم ولایت بدخشان افغانستان را تصرف کرده‌اند.
تاجیکستان گفته که با توجه به "مناسبت‌های نیک همسایه‌داری و دخالت نکردن به امور داخلی افغانستان" به نظامیان افغان اجازه ورود به قلمرو خود را داده است.
قبل از این نیز چندین بار نظامیان افغان وارد کشور تاجیکستان شده بودند. دو روز قبل بیش از ۳۰۰ سرباز و افسر افغان از ولایت بدخشان وارد تاجیکستان شدند.
پیشتر از آن، بیش از ۱۵۰ نظامی دیگر افغان بعد از درگیری با طالبان وادار شدند تا به تاجیکستان عقب نشینی کنند.
در همین حال، روز گذشته (چهارم ژوئیه) امامعلی رحمان، رئیس جمهوری تاجیکستان با محمد اشرف غنی، همتای افغانش در یک تماس تلفنی درباره "عقب‌نشینی" نظامیان افغان گفتگو کردند.
آقای رحمان وضعیت در افغانستان را "نگران کننده" خوانده و همزمان از عدم دخالت کشورش در امور داخلی افغانستان و حمایتش را از روند صلح اعلام کرده بود.
بعد از تشدید وضعیت در مناطق شمال افغانستان و تصرف چندین ناحیه مرزی این کشور توسط طالبان در ماه‌های اخیر، تاجیکستان اعلام کرد که نیروهایش را به حالت آماده‌باش درآمده اند.
تاجیکستان بیش از یک هزار و چهارصد کیلومتر با افغانستان مرز مشترَک دارد.
به گفته رسانه‌های دولتی تاجیکستان، حالا وضعیت در مرز این کشور با افغانستان "تحت نظارت مرزبانان تاجیک" قرار داشته است.
